ആലിംഗനം

  

നേരെ നോക്കുന്നത് മുതൽ കെട്ടിപ്പിടിക്കുന്നത്  വരെയുള്ള (അതിനപ്പുറത്തേക്കുള്ളത്  വേറെ പരാമര്ശവിഷയം) ചേഷ്ടകൾക്ക് വ്യത്യസ്ത കാല ദേശ ജനവിഭാഗം നൽകുന്ന മര്യാദാ ഗുണാങ്കം വേറെ ആണ്.

 

ഗർഭിണിയായ ശകുന്തളയെ കൂട്ടി കണ്വൻ  കൊട്ടാരത്തിലെത്തിയപ്പോൾ ദുഷ്യന്തൻ തല ഉയർത്തുന്നില്ല. ഇവൾ ഞാൻ കാരണം ഗർഭിണി ആയി എന്ന് എനിക്ക് ബോധ്യം വരുന്നത് വരെ  ഒരു  പരസ്ത്രീ ആണ്. അവളെ എനിക്ക് നേരെ നോക്കിക്കൂട.

 

ഇനി ഒരു സംഭവം.

 

എന്റെ ഒരു പഞ്ചാബി സുഹൃത് ഉണ്ടായിരുന്നു. ബൽറാം. ആജാനുബാഹു. ഘടാഘണ്ടൻ, സംസാരിക്കാൻ തുടങ്ങുത്  വരെ. സംസാരം, വളരെ സൗമ്യമായി, ഏതാണ്ട് സ്ത്രൈണശബ്ദത്തിൽ.

 

കമ്പ്യൂട്ടർ റൂമിനു പുറത്തുള്ള എന്റെ ഒരു സുഹൃത്തിനു ലൈറ്റർ വേണം. അതുള്ള ആൾ റൂമിനകത്തു പുറം തിരിഞ്ഞു നിൽക്കുന്നു. അകത്തു കടന്നു തോണ്ടണമെന്നു വെച്ചാൽ ചെരിപ്പഴിക്കുക മുതലായ കലാപരിപാടികൾ നടത്തണം. സുഹൃത്  ഞങ്ങളുടെ നേരെ തിരിഞ്ഞ് ഇരിപ്പുള്ള ബൽറാമിനോട് ആംഗ്യം കാണിച്ചു , ലൈറ്ററുള്ള സുഹൃത്തിനെ വിളിക്കാൻ.  ബൽറാം വിളിച്ച് ആംഗ്യം പാസ് ചെയ്തു. അയാൾ വാതിൽ വരെ വന്നു, ലൈറ്റർ  കൊടുത്തിട്ടു പോയി.

 

ബൽറാമിന് അപ്പോഴാണ് വിളിയുടെ ആവശ്യം മനസ്സിലായത്. അയാൾ പുറത്തു വന്നു സുഹൃത്തിനെ ശകാരിച്ചു സമാധാനപ്പെട്ടു; ഈ കാര്യത്തിനാണെങ്കിൽ ഞാൻ വിളിക്കില്ലായിരുന്നു. ഇത്തരം കാര്യങ്ങൾ ഞാൻ ഒരിക്കലും പ്രോത്സാഹിപ്പിക്കയില്ല.

 

ഒരു ദിവസം ജോലി കഴിഞ്ഞു വീട്ടിലേക്കു പോകാൻ ബൈക്ക് സ്റ്റാർട്ട് ആക്കിക്കൊണ്ടു നിന്ന എന്റെ അടുത്ത് വന്നു ബൽറാം. ഒരു സഹായം ബാബു.

തീർച്ചയായും, എന്താ വേണ്ടത്?

ബാബുവിന്റെ കൂടെ ആരും ഇല്ലല്ലോ, ഒരാളെ പിന്നിൽ കേറ്റണം. .

ഓ അതിനെന്താ, നിങ്ങളുടെ സ്കൂട്ടർ എവിടെ?

എന്റെ സ്കൂട്ടർ ഉണ്ട് അതിൽ എന്റെ കൂടെ ബീബി ഉണ്ട്. അവളും അനിയത്തിയും കൂടെ എം ജി റോഡിൽ വന്നതായിരുന്നു. അവളെ ഒന്ന് ബാബു കൂട്ടിയാൽ നന്നായിരുന്നു.

 

ഞാൻ വിഷമത്തിലായി. എന്ത് ചെയ്യും.

 

എന്റെ മനസ്സ് എവിടെയൊക്കെയോ പോയി. ഏതോ ഒരു പെൺകുട്ടിയെ പിന്നിലിരുത്തി ഇവൻ എം ജി റോഡിൽ കറങ്ങുന്നത് കണ്ടു എന്നെങ്ങാൻ !

 

ഞാൻ ചോദിച്ചു: അത് ശരിയാകുമോ?

 

ഒരു പ്രശ്നവുമില്ല. അവൾ വീഴുകയൊന്നുമില്ല, നിന്നെ കെട്ടിപ്പിടിച്ച് ഇരുന്നോളും. (എന്തൊരു പരിഹാരം!)

 

ഞങ്ങളുടെ വീട് അടുത്തടുത്താണ്, അവന്റെ വീട് ആദ്യം.

 

ഞാൻ പറഞ്ഞു: ഒരു വ്യവസ്ഥ! എന്റെ വീട്ടിൽ കേറി അമ്മയെ പരിചയപ്പെട്ടു പോകാം എന്താ?

 

അവനു സമ്മതം. എനിക്ക് കുറച്ചൊരു സമാധാനം.